Labarik-mane ida ho idade fulan 9 ne'ebé sofre moras isin manas grave evakuadu liu husi aviaun MAF no nia ho nia família fila fali ba uma ho ksolok.
Natacio Gusmao, labarik-mane ida husi illa Atauro, sofre isin-manas grave no presiza tratamentu emerjénsia ba nia kondisaun.
Nia hela iha Adara, suku kosteira ida-ne'ebé lokaliza iha kosta oeste illa Atauro, iha ne'ebé la iha estrada liga ba illa nia sidade prinsipál, Vila Maumeta, iha kosta leste.
Bainhira nia komesa sente la di'ak, nia inan-aman tenke lori bero lokál ida-ne'ebé komunidade sira-nian hodi lori nia ba sentru saúde iha Vila Maumeta, ne'ebé lori oras rua.
Hafoin to'o iha sentru saúde, enfermeira sira halo kontrolu no identifika katak nia hetan kanek iha kakorok no isin-manas ne'ebé aas, ne'ebé hamosu konvulzaun no distensaun abdominal, presiza atu hetan tratamentu espesiál.
Bainhira simu tiha rezultadu teste médiku, enfermeira sira deside atu transfere nia ba Ospital Nasional Guido Valadares (HNGV) iha Dili liu husi aviaun MAF, ne'ebé mak opsaun úniku bele fó resposta lalais hodi salva nia husi nia kondisaun kritika.
Abio Tilman, Natacio nia aman ho tinan 37, no nia mós nudar mestre iha ensinu báziku no peskadór lokál iha Adara, esplika oinsá evakuasaun médika salva nia oan-mane nia moris.
"Aviaun MAF ne'e ajuda tebes ami no salva ha'u-nia oan-mane nia moris durante situasaun susar ne'e bainhira ami la iha esperansa," dehan Sr. Tilman.
MAF nia aviaun ajuda tebes ami no salva ha'u-nia oan-mane nia moris.
"Hau agradese tebes ba MAF tanba oferese mai ami aviaun voo ne'ebé seguru hodi ajuda ami to'o iha Dili ho lalais kompara halo viajen ho ro, no ida-ne'e salva ami-nia oan!"
Baibain, viajen ho ro ba Dili bele lori oras 1 to'o oras 3, maibé ho aviaun MAF nian, bele lori menus husi minutu 20.
Estela Noronha, MAF Closing the Loop Coordinator and Accounts Administrator, esplika oinsá nia haree pasiente nia kondisaun bainhira to'o iha Dili ho aviaun MAF VH-MQU iha Sesta, loron 20 Setembru 2024.
Irmán Noronha hatete: "Hau haree katak nia aman hanoin barak, no kous nia iha liman, no bebé ne'e iha kondisaun ne'ebé susar tebes.
"Bainhira sira atu hakat tama ba ambulánsia, derepente de'it bebé ne'e soe be'e foer, no ha'u hanoin katak nia iha problema iha kabun."
Estela espresa oinsá nia observa pasiente nia kondisaun rekupera durante halo vizita ba ospitál hodi observa pasiente sira nia kondisaun iha HNGV.
"Bainhira ami ba ospitál, ha'u espekta katak nia sei nafatin iha situasaun hanesan uluk no presiza halo observasaun klean."
"Hau hakfodak katak bebé ne'e rekupera ona, no nia aman hatete katak nia kabun di'ak ona. Ha'u kontente tebes tanba ha'u haree ninia kondisaun sai di'ak liu tán," Estela hatete.
Sr. Tilman mós hato'o nia agradesimentu ba prezente adisionál husi ekipa MAF nian iha Dili.
"Ami simu pasta ida ne'ebé ekipa MAF fó nu'udar prezente espesiál ida ne'ebé kontein sasán importante sira hanesan roupa, hahán, bee-moos no sasán sanitária sira," dehan Tilman.
"Hau agradese tebes tanba apoiu husi MAF, ne'ebé ajuda tebes ami durante ami hela iha ospitál."
Bebé Natacio hela iha ospitál maizumenus semana ida, agora nia hetan alta no sente di'ak ona.
Sira fila fali ba Adara iha Sesta, loron 27 Setembru 2024, ho aviaun MAF, VH-MAH, ne'ebé lori husi pilotu Kapitaun Ping Domtta.
Estela Noronha mós hato'o nia agradesimentu ba doadór MAF sira ne'ebé suporta ekipa hala'o programa ne'e hodi ajuda Timor oan sira.
"Hau agradese tebes ba imi-nia di'ak no tulun, no favór ida kontinua imi-nia apoiu hodi ajuda Timor oan sira tanba ida ne'e signifikante tebes ba sira." nia hatutan.