Istoria husi: Lobitos Alves
Sofre isin-manas makas no diarréia, bebe Raiyan evakua husi Suai ho MAF, iha kustu súdoeste Timor-Leste nian to'o Dili, kapitál iha kosta norte, iha ne'ebé nia hetan tratamentu intensivu ho susesu.
Raiyan Lazarus da Costa Pires, bebe ida ho idade fulan rua, sofre ona diareia kritika, kondisaun ida ne'ebé presiza evakuasaun urjente husi Ospital Referal Suai hodi hetan kuidadu espesializadu iha Ospital Nasional Guido Valadares iha Dili.
Labarik Raiyan tenke halo viajen ho ambulánsia, maibé nia kondisaun signifika katak viajen naruk ho estrada husi Suai la posivel - sei lori oras 8 atu to'o Dili.
Tanba ne'e, MAF nia medevac sai hanesan alternativa úniku, ne'ebé sei lori minutu 35 de'it.
Sr Francelino da Costa Barros, bebé Raiyan nia aman no serbisu nudar karpinteiru lokal, dskreve nia oan-mane nia kondisaun durante iha tempu susar.
Sr. Barros hatete: "Nia sente moras tebes iha nia kabun, tan ne'e ami lori nia ba halo check-up iha Ospital Referal Suai."
"Hafoin halo tiha check-up, enfermeiru sira deside katak nia tenke hela iha Unidade Kuidadu Intensivu (ICU) hodi hetan tratamentu espesiál."
Bebé Raiyan hela iha Ospital Referal Suai durante loron haat, maibé nia kondisaun la diak, nune'e enfermeira sira deside atu transfere nia ba Dili liu husi MAF.
Sr Barros dehan: "Ami mai Dili liu husi aviaun MAF. "Bainhira ami to'o iha ospitál nasionál, enfermeiru sira lori nia ba ICU, no nia hela iha ne'ebá durante loron tolu.
"Tuir mai sira muda nia ba Unidade Kuidadu Intermédiu, no nia hela iha ne'ebá ba semana rua."
Sr. Virginia Vicente Pires, bebé Raiyan nia inan, hato'o nia sentimentu kona-ba oinsá nia oan-mane hetan salvasaun durante tempu susar.
“Ha’u triste los bainhira nia iha kondisaun kritiku, maibé agora ha'u agradese tebes ba Maromak. Liu husi ninia kbiit, ha'u-nia oan sai di'ak fali ona.
Ha’u triste los .... Liu husi ninia kbiit, ha'u-nia oan sai di'ak fali ona.
"Hau agradese tebes ba MAF no sira nia ekipa hodi ajuda ami semo ho diak husi Suai ba Dili."
Raiyan no ninia família hela iha Dili kuaze fulan ida, depois fila fali ba uma, ho nafatin aviaun MAF.
Sr Barros esplika oinsá MAF nia servisu hala'o papél importante hodi ajuda povu Timor-Leste.
"Hau orgullu tebes ho MAF nia servisu, ne'ebé halao iha situasaun emerjénsia hodi ajuda no salva povu nia moris iha Timor-Leste.
Sr Barros hatete: "Hau prefere atu fila fali ho aviaun MAF tanba ami viajen ho tempu badak duke vaijen ho bis.
“Viajen fila fali ho bis liu husi estrada ne’ebe la diak bele fo impaktu la diak ba ha’u nia oan mane nia saude. Semo ho MAF mak opsaun ida ne'ebé seguru no lalais liu."
Domingos Falo, Asistente Operasaun ida ne'ebé servisu ona ho MAF durante tinan lima liu, esplika oinsá nia sente hanesan hola parte ida husi misaun salva moris.
Sr. Falo hatete: "Hau sente orgullu tebes tanba ha'u hola parte iha misaun ne'e hodi serbí ho laran no domin hodi ajuda ema ne'ebé presiza ajuda.
"Bainhira ami simu kontaktu husi servisu ambulánsia nasionál, ami sempre prontu atu ajuda ami nia pilotu sira atu prepara buat hotu, tanba tempu mak importante tebes ba ami atu salva ema nia moris."