Ho venenu ne'ebé tama liu husi nia isin, Juvenia ho idade tinan haat presiza tratamentu urjente atu bele moris nafatin. Klínika lokál la iha antivenenu atu salva nia. Alternativa mak viajen ho ambulánsia durante oras haat ba ospitál prinsipál.
Istoria husi Lobitos Alves
Labarik Juvenia da Costa Noronha presiza tratamentu urjente bainhira hetan tata husi samea venenu iha nia uma iha Betano, sidade ida iha kosta súl Timor-Leste.
Enkuantu venenu habelar iha labarik tinan haat ne'e nia isin, nia familia lori nia ba klinika ne'ebé besik liu iha Same, iha Munisípiu Manufahi.
Maibé nia aman Octaviano de Araujo Noronha, agrikultor lokál, sente preokupa los bainhira antivenenu ne'ebe sira presija los la disponivel iha sira nia fatin.
"Ha'u sente triste los bainhira ha'u rona katak nia hetan tata husi samea samodok," dehan Sr Noronha,
"Ha'u tauk los ba venenu habelar iha nia isin, ne'ebe bele fo ameasa seriu ba nia moris.
"Hafoin samea tata tiha, ami lori kedas nia ba sentru saúde iha Same, maibé enfermeira sira hatete katak la iha ai-moruk espesífiku atu halo tratamentu ba nia, tan ne'e presiza lori nia ba Ospital Nasional Guido Valadares (HNGV) iha Dili."
Ho tempu ne'ebé folin-boot nafatin lao, viajen ho ambulánsia durante oras haat bele lori tempu naruk ba Juvenia. Voo viaun MAF ho pilotu Philipp Techand konsege lori Juvenia ho seguru ba kapitál Dili iha minutu 25 de'it nia laran, nune'e nia bele to'o lalais iha ospitál nasionál.
"Ha'u sente la iha esperansa tanba ha'u hanoin katak nia sei lakon ninia moris se nia viajen ho ambulánsia. Tuir mai enfermeira sira fó-hatene ami katak nia sei transfere ho aviaun MAF," dehan Sr. Noronha.
"MAF fó esperansa mai ami hodi lori ami ba Dili ho lalais liu."
MAF fó esperansa mai ami hodi lori ami ba Dili ho lalais liu
Sr. Noronha baibain kuda ai-farina, fehuk, ai-dila, hudi no talas iha nia toos. Nia mós servisu iha natar no fa'an ikan fresku hodi sustenta nia família.
Aman ne'ebe senti kmaan esplika kona-ba importansia husi MAF nia konektividade aviasaun ba nia.
Nia hatete: "Hau agradese tebes ba MAF tanba ajuda ami hodi fó resposta ba situasaun emerjénsia nian, no lori ha'u nia oan-feto husi Same ba Dili hodi bele hetan tratamentu espesiál."
"Ohin loron, ha'u kontente tebes tanba ha'u nia oan-feto sai di'ak fali no hetan salvasaun fali iha situasaun ne'ebé sériu. Ami halo orasaun ba Maromak atu kontinua fó bénsaun ba MAF hodi ajuda ema iha Timor-Leste."
Inggrid Pinto, MAF nia Kapelán Hospital, nu'udar parte husi ekipa ne'ebé kontinua fó apoiu ba Juvenia bainhira nia hela semana ida atu rekupera iha ospitál (HNGV), dook husi uma.
Mana Pinto hatete: "Juvenia presiza evakuasaun emerjénsia tanba nia iha kondisaun ne'ebé susar, no venenu husi samea ne'e perigu tebes no bele fo risku ba nia moris."
"Hau kontente tebes tanba ha'u haree katak nia kondisaun diak kuandu ami vizita nia iha HNGV, no ida ne'e fó hanoin mai ha'u kona-ba impaktu ne'ebé MAF halo hodi salva nia moris.
"Halo parte iha misaun ida ne'ebé salva moris nu'udar priviléjiu boot ida, no ha'u orgullu atu hamutuk iha MAF hodi ajuda ema Timoroan sira ne'ebé presija ajuda."