Bainhira Juvenia iha kondisaun krítiku, esperansa to'o liu husi aviaun MAF. Mai hamutuk ho ami bainhira ami halo vizita akompañamentu ba Juvenia no nia família iha sira nia uma iha Same, Timor-Leste.
Istoria husi Lobitos Alves
"Bainhira la iha aviaun ida iha tempu ne'ebá, ha'u hanoin katak Juvenia sei la moris,” Rosalia Soares da Costa dehan, bainhira nia hamrik hela iha nia uma oin, besik fatin ne’ebe samea tata nia oan-feto.
Bainhira la iha aviaun ida iha tempu ne'ebá, ha'u hanoin katak Juvenia sei la moris,
Has hun boot ida hamriik aas iha jardín oin iha Juvenia da Costa Noronha nia uma-duut nia oin,modelu uma tradisional Timor-oan nian. Nia tahan fo mahon iha tempu manas, no kosar hanesan ohin loron. Ho nune’e mak Juvenia, labarik ho idade tinan lima halimar iha ai-hun ida ne’e bainhira same aida ne’ebe ho venenu makas tata nia, iha fulan lima liu ba.
Juvenia hamriik hamutuk ho ninia inan-aman bainhira sira serve hela goiabas fresku, rambutan, no nu’u ba iha sira nia vizitor sira. Nia aman Octaviano dé Araujo Noronha, lori vizitor sira lao haleu sira nia to’os kiik ida no manu-inan sira ke’e hela rai buka insektu, no manu aman sira kokorek fila-fila hanesan uma-nain hein hela uma.
MAF nia pilotu no Diretor Nasional, Lungpinglak "Ping" Domtta, no Yohanes da Costa Silva, Ofisial Dezenvolvimentu Parseria MAF, vizita Juvena ho nia família hodi akompañia sira hafoin voo evakuasaun medika ne’ebe relasiona ho tratamentu anti-venenu ba nia.
Ping hatete, “Ami nia jornada la’os deit atu transfere sira no haluha sira-nia viajen. “Ami hakarak hola parte bai ha sira nia moris. Ho nune’e, ami mai fila fali atu buka hatene kona-ba sira nia kondisaun no uza tempu balu hamutuk ho sira.”
Rosalia hatete: "Ami lori nia ba klínika suku nian. Doutór sira fó hatene ami katak sira la iha anti-venenu, no nia presiza lori ba ospitál nasional tanba venenu ne'e forte no bele ameasa nia moris."
Juvenia tenke halo viajen ho ambulánsia husi nia uma iha Same ba Dili, viajen ida ne'ebé sei lori oras haat iha estrada ne’ebe bobar ba mai no tatidik.
Octaviano hatete: "Viajen ho distansia ne’ebe dok bele tau nia moris iha perigu laran. “Nia bele mate iha dalan klaran ba Dili.”
"Aviaun MAF ajuda ami hodi lori ami nia oan-feto ba halo tratamentu emerjénsia iha ospitál nasionál," nia hatete, bainhira koalia kona-ba voo evakuasaun medika ho minute 25 husi Same a Dili.
"Hau kontente tebes tanba nia rekuperadu ona."
Hafoin fila tiha husi ospitál, Juvenia rekuperadu ona no agora moris ho kontente hamutuk ho nia inan-aman no bin-alin nain haat. Nia ba fali eskola hodi tuir klase primeiru iha Eskola Baziku Raifusan, iha ne'ebá nia gosta fahe tempu ho nia kolega sira no halimar brinkedus.
Ping esplika importánsia husi MAF nia servisu evakuasaun médiku hodi suporta komunidade remota sira, liu-liu iha Same, no mensiona kazu hanesan labarik Juvenia nian.
Nia hatete: "Kada minutu importante tebes, ne’e duni ha’u fiar katak ami nia servisu evakuasaun mediku iha ne’e halo diferensa makas ba iha ema nia moris,”
“Ida ne’e lori ksolok boot mai ha’u no ami nia ekipa. Ha’u mos kontente los atu fila no lori ami nia esperensia ne’ebe hare rezultadu husi alin feto ne’ebe iha situasaun kritiku iha momentu ne’eba no desde nia sai husi ospitál."
Ping mós hato'o nia agradesimentu ba doadór sira ne'ebé halo MAF bele ajuda ema iha área remota sira.
"Agradese ba ema hotu ne'ebé fó apoiu mai ami; Ita-boot sira nia kontribuisaun fó apoiu no esperansa ba ema iha komunidade sira ne'e."